PEMBICARAAN DI ACARA MARHATA SINAMOT

PEMBICARAAN MARHATA SINAMOT

Anwarjaya16.blogspot.com

PARBORU:

Dihamu parboruon nami, nangkin nungga tangkas di pasahat hamu tu hami tudu-tudu ni sipanganon on. Songon tona ni oppunta, andorang so di seat raut sai parjolo do di seat hata. Songon dia ma partording ni tudu-tudu ni sipanganon on amang boru. Botima.

PARANAK:

Taringot tu tudu-tudu ni sipanganoni Rajanami, hamu ma namangatur. Songon dia adat di hutant on. Ido ihuttonon ta. Botima.

:

Mauliatem di hamu parboruon nami, Molo songoni do pasahat hamu ma tu boru asa di boan nasida tu meja dua (2), laos nasida ma paturehon disi.

Di hita sude napungu dison, loloan dalihan na tolu dohot dongan sahuta! Ala mardalan do tingki, martangi-tangian ma hita asa tamulai sintuhu ni pangkataion. Alai andorang so hupataripar hami tu hamu boru nami,  lehon hamu jo tingki tu hami asa marsiaturan hami namardongan tubu.

PARANAK:

Na denggan Rajanami!

PARBORU:

Di hita namardongan tubu! Tona ni omputta na mandok:

Tartallik huling-huling, tarida holi-holi;

Molo si anggian marulaon haha doli ma antong nagabe panamboli.

Tangkas taboto ia hasuhuton di hami anggimu, tontu hamu haha doli ma na gabe panamboli, nagabe Raja panungkun di sintuhu ni pangkataion tu parboruonta na ro di tingkion. Jadi mardoani roha ma hamu haha doli nami.

HAHA DOLI NI SUHUT PARBORU:

Mauliatema si hamu anggi doli nami, ala sai tong-tong do hita marsipasangapan.

Ipe di hita horong ni haha doli, ise ma hita manungkun sintuhu ni pangkataion tu parboruonta.

Setelah di sepakati seorang dari mereka yang menjadi juru bicara (Raja parhata) pihak parboru, lalu iapun berkata: 

Horas ma jala gabe.

Ipe di hamu Rajani pamoruon nami, molo nung rade hamu asa mangkatai hita.

PARANAK:

Mauliatema di hamu Rajani hula- hula! Alai andorang ao hualus.i hami hamu, mangido tingki jo hami asa maraipasangapan jo hami namardongan tubu.

PARBORU:

Nadenggan Amangboru!

PARANAK:

Di hita namardongan tubu! Di angka ulaon namaraintuhu, molo haha na namarulaon anggi doli ma nagabe panamboli, molo anggi doli na marulaon haha doli ma nagabe panamboli. Ido tonani omputta. Tangkas taboto nuain haha doli ma namarulaon, tontu anggi doli ma na gabe panamboli. Ipe pinasahat ma tu hamu anggi doli nami.

ANGGI DOLI NI SHUT PARANAK:

Mauliate ma di hanu haha doli nami, Ala sai tong-tong do hita marsipasangapan. Ipe di hita horong ni anggi doli, ise ma hita mangalusi sintuhuni pangkataion tu Rajani hula- hulanta.

 Setelah di sepakati seorang dari mereka yang jadi juru bicara (Raja parhata) pihak paranak, lalu iapun berkata:

Horas ma jala gabe.

Di hamu Rajani hula-hula nami, Nungga rade hami Rajanami.

PARBORU:

Mangkatai ma hita tutu amang boru.

Nungga butong hita mangan, mahap malompan juhut na marsaudara. Asi ma antong roha ni Tuhan, sai pamurnas mai tu daging, saudara tu bohi, si palomak imbulu mai jala si paneang holi-holi. Horas ma hita namanganthon, tu gandana ma di hamu namangalean.

Marnatampak hamu na mardongan tubu, na marboru, dohot namar hula-hula, ro mandapothon hami. Tontu adong ma sintuhu ni pangkataion. Hatahon hamu ma amang boru!.

PARANAK:

Horas ma jala gabe Rajanami.

Taringot tu sipanganon nasosadiai, pamurnas mai tu daging, saudara tu bohi,  sipalomak imbulu mai tutu si paneang holi-holi. Tung songoni pe sipanganon Rajanami, Sititi ma sigompa golang-golang pangarahutna; 

Sipanganon naso sadiai rajanami, sai godang ma pinasuna.

Ia haroro nami rajani hula-hula, Parhorasan panggabean do raja nami.

PARBORU:

Gabe ma tutu jala horas, Amang boru!

Sahat ma panggabean sahat nang parhorasan di hita saluhutna.

Alai marangkup do nauli jala mardongan do na denggan, si angkup na songon nahundul si udur songon na mardalan. Siangkup nai amang boru tung tangkas ma tariasson hamu. Botima amang boru.

PARANAK:

Mauliate ma Raja nami! 

Tangkas ma tutu paboaon siangkup ni nauli na denggani.

Rajanami! Rajani Hula-hula!

Balga anak pinangolihon, Balga boru pahutaon.

Ro anak nami mangalu-alu tu hami, naung marsi haholongan ninna boru ni rajai dohot anak nami i. Marsangkap nasida naeng mamungka parsaripeon. Jadi alani rajanami, Mangelek hami tu hamu asa jangkon hamu nian anak nami i, gabe hela mu. Ianggo alani sinamot do rajanami dangbarani hami ro mandapothon hamu, alai ala holong nasian Tuhantai do marpos ni roha hami.

Nangpe songoni rajanami anggo somba ni uhum sai napasahaton nami do olat ni natarpatupa hami. Pos do roha nami Rajanami tung naso appehonon muna tuhami na so tartuhuk nami. Songonima rajanami sintuhuni haroro nami. Botima.

PARBORU:

Horas ma jala gabe amang boru!

Toho ma tutu sibotu uhum siboto adat hamu amang boru. Ai tung manat do hamu pabotohon sidohonon muna. Sai rongkap ni boru nami ma tutu i anak munai. Alai anang boru, jolo hupatangkas hami jo boru nami, atik boha adong angka nasala pengertian.

Hamu boru nami (terarah ke boru pihak parboru) sungkun hamu jo maen muna, manang na toho do alu-alu ni  anak ni pamoruon nami on.

Setelah sigadis di tanya, mengiyakan, pembicaraan di lanjutkan.

Antong molo songoni mauliate ma di Tuhanta. Lasma rohatta ala naung marsihaholongan  akka ianakkonta.

Mardomu tusi Amangboru, tontu nungga adong konsep muna di sangkap parsaripeon ni anak muna dohot boru nami on. Di dok roha pintor hatahon hamu ma siani sinamot godang-godang tu suhini ampang na opati. Sadiama tu suhut, sadia tu pamarai,  sadia tu pariban dohot sadia tu tulang ni boru nami on. Songoni tu angka todoan, ompung bao dohot ompung suhut. Hatahon hamu ma Amangboru!.

PARANAK:

Mauliate ma di Tuhan, mauliate nang di hamu Rajanami!

Sipanolopi do tutu hamu di sangkap ni anak nami na naeng mamukka parsaripeon dohot boru ni rajai.

Taringot tu sinamot nagodang rajanami, lehon hamu majo tingki di hami asa sisada tahi hami.

Dihita namardongan tubu, boru nami, tarlobima di hamu hula-hula nami. Nungga tung tangkas di paihut-ihut hamu songon dia pangkataion nami tu rajani hula-hula nami. Nagolitonta ma snamot tusuhi ni ampang naopati,  pinagido ma pandapot sian hamu boru nami, dongan tubu nami, dohot panuturion sian hamu hula-hula nami. Pinasahat majo tu hamu boru nami.

BORU NI PARANAK:

Mauliate ma di hamu hula-hula nami. Nungga pinaihut-ihut pangkataioni jala tangkas do ni atusan. Pangidoan ni hula-hula sian baribaan  toho doi, songoni do adat na pinukka ni omputta, jaloon ni parboru ma sinamot ima naginoaran upa suhut, upa pamarai manang si jalo bara, upa pariban dohot upa Tulang. Alai tutu molo tahatai anong sada-sada, godang ma mago tingki. Jadi pangidoan nami hula-hula  satahi ma hita mangelekkon asa di pasadai sude si tombol, jala sahali mangelekkon ma nian hita tu nasida.

Songonima pandapot manang usul sian hami boru muna. Botima.

DONGAN TUBU PARANAK:

Horas ma jala gabe!

Nungga tung nadenggan ni dok ni boruttai, tanda do nasida namangantusi di angka arga ni tingki. Alai adong dope sitambaan tu usul ni boruttai. Di pasada ma sude sinamot tu suhi ni ampang na opati, jala sahali mangelekkon ma hita tu hula-hulanta, huhut di alaman nasida ma nian pesta unjuki manang songon ni dok ni adat alap jual.

Songonima sian hami songon na manambai pangidoan ni borunta. Botima.

HULA-HULA PARANAK:

Dihamu pamoruon nami! (disebut marganya)

Nungga tung tangkas hupaihut-ihut hami pangkataion muna. Mansai las roha umbegesa ala naeng mamungka parsaripeon ma hape bere nami. Anggiat ma di pasahat Tuhan sangkap ta on.

Taringot tu somba ni uhum  na naeng sipasahatin muna, di jalo roha doi. Alai molo naeng sahali mandok hamu di sinamoti, sosohonon ma tu hamu asa tung manat hamu mandok. Antusi hamu ma nilai ni rupiah nuaeng on.

Songoni ma tu dongan sahundulan nami marga..(disebut marganya) di dik omputta do:

Hot pe jabui tong do margulang-gulang:

Boru nise pe di alap bere i, tong doi boru ni tulang.

Jadi na nialap ni berei tong dou borukku, boru nami. Ala ni i, dohonon ma tuhamu nadua haduhuton.

Balintang ma pagabe tu mandakkon sitadoan;

Ari mu ma antong gabe molo olo hamu marsipa olo-oloan.

Songonima hata sian hami. Botima.

PARANAK:

Di hamu Rajani hula-hula nami. Nungga rap imbege songon dia sada ni roha nami.

Sinamot sipasahaton nami ima upa suhut, upa pamarai, upa pariban, dohot upa tulang, na nidok suhi ampang na opat di adat tai Raja nami, mangelek ma hami asa tapasada jala sahali mangelekkon ma hami. 

Udut tusi rajani hula-hula, tung tangkas ma nian alapon nami parumaen sian tongani alaman ni rajai. Ima pangidoan dohot elek-elek nami rajanami. Botima.

PARBORU:

Mauliatema amang boru!

Tanda do hamu anak ni Raja, siboto uhum dohot siboto adat, sai pintor di lului hamu do sadani roha dohot panuturion sian hula-hula muna, haha ni parhundul nami.

Ipe amang boru lehon hamu majo tingki di hami asa sada hami mangalusi hamu.

Di hita namardongan tubu, boru nami, dongan sahuta nami, lumobi ma di hamu hula-hula nami. Asa sada alusta tu barboruonta, pinangido majo pandapot sian hita lumobi ma panuturion sian hula-hula nami. Parjolo ma nilehon tingki tu boru.

BORU NI PARBORU:

Mauliate ma di hamu hula-hula nami!

Ala di patama hamu hami boru muna mandohoti pangkataion on.

Pangidoan ni nadida si sahali mangelekkon jala di pasada suhini ampang na opat, di roha nami dang salai.

Sai namangantusi do pariban nami pamoruon muna sian baribaan. Songonima hata sian hami boru muna. Botima.

DONGAN SAHUTA NI PARBORU:

Horas ma di hamu suhut nami dohot sude uduran muna namandohoti kangkataionon.

Mauliate pinasahat tu hamu ala di pajagar hamu do hami dongan sahuta mangantoi ulaonta di tingkion. Taringot tu pangidoan ni pamoruon muna sian baribaan  napasadahin suhi ni ampang naopati, jala sahali mangelekkon nasida nungga unei di roha nami.

Aek godang tu aek laut;

Dos ni roha si baen nasaut.

Songonima hata sian dongan sahuta. Botima.

DONGAN TUBU NI PARBORU:

Horas ma namangande, horas andean ni hata.

Molo dang sala au pangidoan ni pamoruonta songonon ma:

  1. Di pasada ma suhi ni ampang na opat. Berarti suhut bolon ma na mambagi tu pamarai, tu pariban, dohot tu tulang ni borunta.

  2. Sahali mangelekkon ma nasida di godang ni sinamot, lapatanna dang pola be marsitawaran manang marsi igilan, sadia di elekkon nasida ima jadi na.

  3. Ulaon di alap jual, di hutanta ma pesta jala hita ma na mambahen pestai.

Nian lomos do au, sotung do anong dao sian nahinarapphoni suhutta godang ni sinamot naeng sihatahonon ni nasida. Alai tahe songon ni dok ni borutta pariban nasida namangantusi do pqrboruonta. Suang songoni do dongan sahuta, di sosohon nasida do dos ni roha si baen nasaut.

Jadi au pe mandok nanangantusi do nasida parboruonta ai; Songon namandanggurhon batu tu dolok do mangalehon tu hula-hula. 

Mulak do muse batui tu adopani namandanggurhoni jala mangihut dope muse angka batu naasing. Jadi posma rohanta, tatolopi ma pangidoanni parboruontai. Songonimo hata sian hami dongan tubu. Botima.

HULA-HULA NI PARBORU:

Di hamu parboruon nami marga (disebut marganya)

Nungga tangkas hupaihut-ihut hata pangidoan sian pamoruon muna (marga) dongan sahuta, dongan tubu muna. Molo pinarate-atehon sude hatai mansai las roha umbegesa. Dangafong na risi, dangadong nasongkar. 

Suang songoni do sian hami hula-hula muna sipanolopi nauli do hami.

Jala pis do roha tu nauli do sundung ni natahatai on.

Balintang ma pagabe tumundalhon sitadoan;

Ari mu do antong gabe ala olo hamu marsipaolo-oloan.

Songoni ma hata sian hami. Botima.

PARBORU:

Nungga tangkas tabege hata sian borunta!

Sian dongan sahuta, sian hita namardongan tubu, lumobima sian hula-hulanta. Mauliate ma di hamu. Ala dilehon hamu do roha dohot pingkiran muna mandohoti pangkataion on.

Sonari alusan ma antong pangidoanni pamoruonta.

Amang boru, Raja ni pamoruon!

Nungga dos rohanami di pangidoan munai, ima napasadaon muna suhi ni ampang na opati, sahali mangelekkon hamu naso jadi marsi igilan, jala ulaoni di alap jual. Huolohon hami mai. Jadi hatahon hamu ma Amang boru songon dia bohi ni sinamot nanaeng sipasahaton muna. Botima.

PARANAK:

Mauliate malambok pusu ma dohonon nami tu hamu Raja ni hula-hila nami. Pintor sai di oloi hamu do pangidoan nami i. 

Jadi sonari Rajani hula-hula, hatahonon nami ma sinamot naung pinapungu ni suhut nami nanaeng pasahaton  tu hamu hula-hula nami, Godang na Rajanami...

Rp. 150.000.000 (saratus lima puluh juta rupiah) sitombol mai rajanami.

Songon ni dok ni natua-tua;

Amporik mallipik, Organg marbabang;

Gabe do parsinamot (parboli)na otik  Gabe do parsinamot na godang.

Olophon hamu mai Rajanami! Botima.

PARBORU:

Horas ma jala gabe amangboru.

Tutu do songon na ni dok munai Gabe do parboli na otik, laos gabe do parboli nagodang. Alai nang pe songoni tong do jolo alapon hata sian bona hasuhuton.

Ipe bona haduhuton nami, di dok natua-tua; Lasiak narara binahen tu panatuan; raja pe na raja hasuhuton do sibaen keputusan.

Onpe hupasahat ma tingkion tu hamu.

SUHUT SIHABOLONAN PARBORU:

Di hamu dongan tubukku!

Taringot tu sinamot naung rap umbege hita, on do dohonon nami: Molo naung unei di rohamu, nungga tung unei di roha nami, ai si sada lulu anak do hita, sisada lulu boru. Botima.

PARBORU:

Mauliate ma di hamu suhut nami!

Ipe di hamu Rajani pamoruon nami sinamot nanihatahonon munai, Huoloppon hami mai.

Alai amang boru anggo di matani ulaoni tangkas do pasahaton muna  panandaion tu suhi ni ampang naopat dohot jambar todoan.

Jala taringot tu jambar titin marangkup, ima jambar ni tulang ni nanaeng hela nami, rap mangadopi ma hita di matani ulaoni jala asa masi paubuhan suhutta nadua. 

Songonima amang boru. Atik adong dope si dohonon muna mardomu tu ulaontaon, pinasahat ma tingki tu hamu.

PARANAK:

BERSAMBUNG..